iDitord ահազանգերի քարտեզը շարունակում է հետեւել ընտրական գործընթացին

iDitord բլոգ

Ընտրախախտումներ հայտնաբերելիս հարկավոր է դրանք արձանագրել և միջոցներ ձեռնարկել դրանց կանխման կամ հետևանքների վերացման ուղղությամբ: Դեռևս խորհրդարական ընտրություններին գործարկված iDitord կայքը, որի նպատակն է խթանել ընտրական գործընթացների նկատմամբ հասարակական վերահսկողությունը, թևակոխել է նոր փուլ՝ կրկին հնարավորություն տալով քաղաքացիներին ահազանգել ընտրախախտումների մասին։ Խախտումները վերաբերում են ինչպես բուն քվեարկության գործընթացին, այնպես էլ նախընտրական և հետընտրական ժամանակահատվածին:

Ծրագրի համակարգողները, հաշվի առնելով նախորդ փորձը, ծրագրի արդյունավետությունը բարձրացնելու նպատակով նոր բաղադրիչ են ավելացրել ծրագրում: Հինգ հոգուց բաղկացած լրագրողների խումբը՝ հիմնվելով կայքում քաղաքացիների կողմից գրանցված վստահելի հաղորդագրությունների վրա՝ փաստերի կրկնակի ստուգում են իրականացնում և փոքրիկ հետաքննական նյութեր պատրաստում iDitord-ի բլոգի համար: Այս նյութերը կարող են օգտագործվել լրագրողների կողմից՝ իրենց սեփական լրագրողական աշխատանքներն իրականացնելիս:

Ահազանգերն ամփոփվում են ինտերակտիվ ռեժիմով աշխատող քարտեզի վրա, որը հնարավորություն է ընձեռում պատկերել ընտրախախտումների բաշխումն ըստ տեսակների, ահազանգերի ստացման աղբյուրների, հավաստիության և այլն: Վստահելի են համարվում այն ահազանգերը, որոնցում զեկուցողը հայտնում է իր տվյալները և նրա հետ հնարավոր է կապ հաստատել, որոնք պարունակում են լուսանկարներ կամ տեսանյութեր, ինչպես նաև նրանք, որոնք հաստատվում են նաև այլ աղբյուրների` դիտորդների, ԶԼՄ-ներ կամ այլ քաղաքացիների կողմից:

iDitord կայք

iDitord հարթակում ընտրախախտումների մասին ահազանգերը գրանցելու մի քանի տարբերակ կա`թեժ գիծ, որով քաղաքացին կարող է զանգահարել օպերատորին նշված համարով և թելադրել խախտման մանրամասները, կարճ հաղորդագրություն sms-ի ստանդարտ գումարով, թվիթերով՝ կիրառելով #iditord հեշթեգը և վերջապես, դուք կարող եք բոլոր մանրամասներով ընտրախախտումը գրանցել կայքի միջոցով։

Նախագծի աշխատանքային խումբն առաջնորդվում է ՀՀ «Զանգվածային լրատվության մասին» օրենքի 5 հոդվածով և պարտավորվում է գաղտնի պահել քաղաքացու տվյալները՝ չտրամադրելով երրորդ կողմին ուղարկողի հեռախոսահամարը, որից զանգահարել կամ sms են ուղարկել, և այն IP հասցեն, որը գրանցվել է կայքում ընտրախախտում գրառելիս։
iDitord նախագծի համար «Բազմակողմանի տեղեկատվության ինստիտուտը» ֆինանսավորում է ստացել «Եվրասիա համագործակցության հիմնադրամ» («Լրատվության այլընտրանքային միջոցներ» ծրագրի շրջանակում) և «Բաց հասարակության հիմնադրամներ-Հայաստան» կազմակերպություններից:

Ընտրախախտումների քարտեզը մշակվել է` հիմք ընդունելով «ուշահիդի» առցանց գործիքը, որը ստեղծվել է 2007թ. Կենիայի նախագահական ընտրությունների ընթացքում տեղ գտած իրավախախտումներն ամփոփելու համար: Հետագայում այն օգտագործվել է բազմաթիվ այլ երկրներում ընտրությունների գործընթացները դիտարկելու նպատակով:

«Այլ կարծիք»՝ Երևանի մամուլի ակումբի վիդեո-բլոգ

V-blog # 5. Միքայել Զոլյանն ու Հրանտ Տեր-Աբրահամյանը

Սա «Լրատվության այլընտրանքային ռեսուրսներ» ծրագրի շրջանակներում ստեղծված մի այլընտրանքային հարթակ է, որտեղ իրենց կարծիքն են արտահայտում մարդիկ, ովքեր հետաքրքիր ասելիք ունեն երկրում տեղի ունեցող զարգացումների և հասարակության առջև կանգնած մարտահրավերների մասին: Վիդեոբլոգը վարում է Երևանի մամուլի ակումբի փորձագետ Միքայել Զոլյանը:

Մինչ օրս ստեղծվել է յոթ թողարկում տարբեր թեմաներով: Շարքը 2012 թվականի դեկտեմբերի 19-ին բացում է «Այլ կարծիք թիվ 1-ը», որտեղ ԵՄԱ նախագահ Բորիս Նավասարդյանը և փորձագետ Հայկակ Արշամյանը խոսում են երկրում նախընտրական իրավիճակի, ընտրությունների համատեքստում քննարկվող թեմաների և լրատվամիջոցների դերի մասին:

Երկրորդ «Այլ կարծիքը» վարում է քաղաքագետ Արմեն Գրիգորյանը՝ խոսելով առանց այլընտրանքի ընտրությունների մասին:
Ամանորի նախօրեին՝ դեկտեմբերի 28-ին ընտրական գործընթացում սոցիալական մեդիայի դերի մասին զրուցում են այդ ոլորտի փորձագետներ Գեղամ Վարդանյանն ու Լուսինե Գրիգորյանը Ինտերնյուսից «Այլ կարծիք-3-ում»:

Չորրորդ՝ արդեն 2013 թ հունվարի 7-ի թողարկման մեջ “Երևան” ամսագրի գլխավոր խմբագիր Արտավազդ Եղիազարյանը և “ուրբան լաբ Երևան” քաղաքաշինության ժողովրդավարացման ինստիտուտի հիմնադիր Սարհատ Պետրոսյանը զրուցում են Երևանի ամանորյա հարդարանքի և քաղաքի այլ խնդիրների մասին:

Հինգերորդ «Այլ կարծիքում» քաղաքագետ Միքայել Զոլյանը և հրապարակախոս Հրանտ Տեր-Աբրահամյանը զրուցում են այն մասին, թե ինչպես պետք է հասարակությանը ներկայացվի Հայաստանի նորագույն շրջանի պատմությունը:

Հունվարի 22-ի թվով վեցերորդ «Այլ կարծիքում» Միքայել Զոլյանի զրուցակիցը Հայնրիխ Բյոլ հիմնադրամի ծրագրերի համակարգող Մալխազ Սալդաձեն է: Զրույցի թեման Բիձինա Իվանիշվիլիի՝ Հայաստան կատարված այցելության և Վրաստանի նոր իշխանությունների արտաքին քաղաքականության մասին է:

Այս պահին վերջին՝ յոթերորդ «Այլ կարծիքի» թողարկման ընթացքում Արևելյան գործընկերության եվրոպական ինտեգրման ինդեքսի թեման քննակում են ԵՄԱ ծրագրերի համակարգող Միքայել Զոլյանը և Վիադրինայի Եվրոպական համալսարանի, Ֆրանկֆուրտ (Օդեր) համալսարանի հետազոտող Իրինա Սոլոնոնկոն:

«Այլ կարծիքի» բոլոր թողարկումները կարող եք դիտել այստեղ:
Հետևեք շարունակությանը մեր ֆեյսբուքյան էջում և բլոգում: Հետաքրքիր է լինելու: